အလ္လာဟ် (سبحانه وتعالى) သည် အလှတရားကို ချစ်မြတ်နိုးပါတယ်၊ အကြောင်းကတော့ اِنَّ اللَّهَ جَمِيلٌ يُحِبُّ الْجَمَالَ “အလ္လာဟ် (سبحانه وتعالى) သည် အလွန်တရာလှပပြီး အလှတရားကို ချစ်မြတ်နိုးပါတယ်”။ ဒီဟဒီးဆ်ဟာ ကျွန်မတို့ ထားရှိသင့်တဲ့ ကိုယ်ကျင့်တရားနဲ့ စိတ်သဘောထားကို ညွှန်ပြနေပေမယ့် အီးဒ်နေ့မှာ အထူးသက်ရောက်မှု ရှိပါတယ်။ တမန်တော်မြတ် (ﷺ) က “မာန အဏုမြူပမာဏမျှ နှလုံးသားထဲမှာ ရှိသူဟာ ဂျန္နဟ်သုခဘုံကို ဝင်ရမှာမဟုတ်ဘူး” လို့ မိန့်ကြားခဲ့ပါတယ်။ ဆွဟာဗဟ်တစ်ဦးက “ယာအလ္လာဟ် (سبحانه وتعالى) ရဲ့တမန်တော်၊ [ဒါပေမယ့်] လူတစ်ယောက်က လှပတဲ့အဝတ်အစားတွေ ဝတ်ချင်ရင်၊ လှပတဲ့ဖိနပ်တွေ စီးချင်ရင်ရော?” လို့ မေးလျှောက်ခဲ့ပါတယ်။ တမန်တော်မြတ် (ﷺ) က “ဒါတွေက ချီးမွမ်းထိုက်တဲ့အရာပါ” اِنَّ اللَّهَ جَمِيلٌ يُحِبُّ الْجَمَالَ “အလ္လာဟ် (سبحانه وتعالى) ဟာ အလွန်တရာလှပပြီး အလှတရားကို ချစ်မြတ်နိုးပါတယ်” လို့ ပြန်လည်မိန့်ကြားခဲ့ပါတယ်။
တမန်တော်မြတ် (ﷺ) က ထပ်မံမိန့်ကြားခဲ့တာက “အလ္လာဟ် (سبحانه وتعالى) မှ အသင့်ကို ကောင်းချီးမင်္ဂလာတစ်ခု ပေးအပ်ထားရင်၊ အလ္လာဟ် (سبحانه وتعالى) ဟာ အဲဒီကောင်းချီးရဲ့ အကျိုးသက်ရောက်မှုကို အသင့်အပေါ်မှာ မြင်တာကို နှစ်သက်ပါတယ်၊ ဒါကြောင့် ကောင်းချီးကို ခံစားပါ၊ ဒါပေမယ့် အလွန်အကျွံ မဖြစ်စေနဲ့။” ဒါကြောင့် လှပစွာ ဝတ်စားဆင်ယင်ဖို့၊ ကျွန်မတို့ရဲ့ အကောင်းဆုံး အဝတ်အစားတွေကို ဝတ်ဆင်ဖို့၊ အလ္လာဟ် (سبحانه وتعالى) ပေးသနားထားတဲ့ ကောင်းချီးတွေကို ယူပြီး ပြသဖို့ – ဒါပေမယ့် ဖော်ပြချင်စိတ်နဲ့ မဟုတ်ဘဲ၊ ကောင်းချီးတွေကို ကျေးဇူးတင်စိတ်နဲ့ ဖော်ပြဖို့ပါ။ အလ္လာဟ် (سبحانه وتعالى) ရဲ့ ကောင်းချီးမင်္ဂလာတွေရဲ့ အမှတ်အသားကို ကျွန်မတို့အပေါ်မှာ တွေ့မြင်နိုင်အောင် လုပ်ပါ – ကိုယ့်ကိုယ်ကို ဂရုစိုက်ခြင်း၊ သပ်ရပ်စွာ ဝတ်စားဆင်ယင်ခြင်း၊ ကောင်းချီးကို ပြခြင်း၊ ပြီးတော့ အလ္လာဟ် (سبحانه وتعالى) ကို ကျေးဇူးတင်ခြင်းတွေ ပြုလုပ်ပါ။ အလ္လာဟ် (سبحانه وتعالى) က ကုရ်အာန်ကျမ်းတော်မြတ်ထဲမှာလည်း مَسْجِدٍ كُلِّ عِنْدَ زِينَتَكُمْ خُذُوا “အလ္လာဟ် (سبحانه وتعالى) ရဲ့ အိမ်တော်ကို သွားတဲ့အခါ အသင်တို့ရဲ့ အကောင်းဆုံး ပုံသဏ္ဌာန်ကို ယူဆောင်သွားကြပါ” လို့ မိန့်တော်မူထားပါတယ်။
အီးဒ်နေ့မှာ ဒါကို အကောင်းဆုံး လက်တွေ့ဖော်ပြနိုင်ပြီး တမန်တော်မြတ် (ﷺ) က ကျွန်မတို့ကို အကောင်းဆုံးပုံစံနဲ့ ထွက်လာဖို့၊ အကောင်းဆုံး အဝတ်အစားတွေ ဝတ်ဆင်ဖို့၊ ခွင့်ပြုထားတဲ့ အတိုင်းအတာအတွင်းက အကောင်းဆုံး အလှဆင်မှုကို ပြသဖို့နဲ့ အလ္လာဟ် (سبحانه وتعالى) ကို ကျေးဇူးတင်ဖို့ မိန့်မှာခဲ့ပါတယ်။
ရှည်လျားတဲ့ရမ်ဿွာန်လ ပြီးနောက်၊ ကျွန်မတို့ဟာ အလ္လာဟ် (سبحانه وتعالى) ကို ကျေးဇူးတင်ပြီး အီးဒ်နေ့မှာ ကျွန်မတို့ရဲ့ အကောင်းဆုံးကို ပြသဖို့အတွက် ခွင့်ပြုထားတဲ့ အတိုင်းအတာအတွင်းမှာ အလှပဆုံးသော အလ္လာဟ် (سبحانه وتعالى) အတွက် အလှအပကို ပြသကြပါတယ်။ ကျွန်မတို့ဟာ ဒီစိတ်သဘောထားကို တစ်သက်လုံးအတွက် ကျင့်သုံးသင့်ပါတယ် – အလ္လာဟ် (سبحانه وتعالى) က ကျွန်မတို့ကို ပေးအပ်ထားတဲ့အခါ ကျွန်မတို့ဟာ ညှိုးနွမ်းပြီး ဆင်းရဲနွမ်းပါးပုံ သို့မဟုတ် ချို့တဲ့နေပုံမျိုး ထွက်စေချင်တာ မဟုတ်ပါဘူး။ အရှင်မြတ်က ကျွန်မတို့ရဲ့ အကောင်းဆုံးကို ပြသစေလိုပါတယ်၊ ဒါဟာ အရှင့်ကောင်းချီးများအတွက် ကျေးဇူးတင်ကြောင်း ပြသတဲ့နည်းလမ်းပါ။ ဒါကြောင့် အီမာမ် အလ်-ဂါဇာလီ (رحمه الله) က သိုးမွေးအဝတ်ကို မလိုအပ်ဘဲနဲ့ ဝတ်ဆင်တဲ့သူ သို့မဟုတ် ဟောင်းနွမ်းစုတ်နေတဲ့ အဝတ်တွေကို ဝတ်တဲ့သူတွေအကြောင်း ပြောခဲ့ပါတယ်။ ထိုသူတို့က ဒါဟာ အလ္လာဟ် (سبحانه وتعالى) ကို ချစ်ခြင်းကို ဖော်ပြတာလို့ ထင်ပြီး ကိုယ့်ကိုယ်ကို ချို့တဲ့စေခဲ့ကြတာပါ။ ဒါပေမယ့် ကျွန်မတို့မှာ ရက်ရောပြီး အရှင့်ကောင်းချီးရဲ့ အမှတ်အသားကို ကျွန်မတို့အပေါ်မှာ မြင်ချင်တဲ့ အရှင်သခင်တစ်ပါး ရှိပါတယ်၊ ဒါကြောင့် အရှင့်ရဲ့ကောင်းချီးများကို ခံစားပါ။
ʿUmar ibn ʿAbd al-ʿAzīz (رضي الله عنه) က ကျွန်မတို့ကို အကြံပြုခဲ့တာက “သင်တို့ရဲ့ ကောင်းချီးမင်္ဂလာတွေကို ဝါကြွားခြင်းမရှိဘဲ၊ ဖော်ပြချင်စိတ်မရှိဘဲ၊ မနာလိုမှုကို ဆွဲဆောင်ခြင်းမရှိဘဲ ပြောဆိုကြပါ။” လူတွေက မနာလိုမှုဆွဲဆောင်တာအကြောင်း ပြောကြတဲ့အခါ၊ အများအားဖြင့် မနာလိုမှုကို အလွန်စိုးရိမ်နေတဲ့သူတွေဟာ အများဆုံး ဖော်ပြချင်တဲ့သူတွေပဲ ဖြစ်ကြတယ်၊ ထိုသူတို့က အလွန်အမင်း ကုန်ကျစရိတ်ကြီးမားတဲ့ မင်္ဂလာဆောင်ပွဲတွေနဲ့ အလွန်အမင်း ကုန်ကျစရိတ်ကြီးတဲ့ အရာတွေကို ပိုင်ဆိုင်ကြသူတွေ ဖြစ်ကြတယ်။ ဒါအစား ကျွန်မတို့ဟာ အရာအားလုံးကို အလွန်အကျွံ မဖြစ်စေဘဲ အလယ်အလတ်လမ်းနဲ့ လုပ်ဆောင်ပြီး اَلْحَمْدُ لِلّهِ “အလ်ဟမ်ဒုလိလ္လာဟ်” ကို အမြဲတစေ ပြောဆိုရပါမယ်။ ကျွန်မတို့ဟာ အလ္လာဟ် (سبحانه وتعالى) ကျွန်မတို့ကို ပေးအပ်ထားတဲ့ အလှအပနဲ့အတူ ကျေးဇူးတင်ကြောင်းကို ကျွန်မတို့ရဲ့ လုပ်ဆောင်မှုတွေထဲမှာ ထင်ဟပ်စေသင့်ပါတယ်။
ကျွန်မတို့ဟာ အလ္လာဟ် (سبحانه وتعالى) မှ ကျွန်မတို့ကို အရှင့်ရဲ့ အလှတရားများနှင့် ရစ်ပတ်လွှမ်းခြုံထားပေးဖို့၊ ချစ်ခြင်းတရားများနှင့် ထွေးပိုက်ထားပေးဖို့ တောင်းဆုပြုလေ့ရှိကြပါတယ်။
ယာအလ္လာဟ်၊ ရက်ရောတော်မူပြီး အလွန်တရာခွင့်လွှတ်တော်မူသည့်အရှင်၊ ယခုဆောင်းပါး series ကို လက်ခံပေးတော်မူပါ၊ ဒီဆောင်းပါးတွေကို ဖတ်ရှုသူတွေအတွက် အရှင်မြတ်၏ အချစ်ကို ခံကြရသူများဖြစ်လာစေမည့် နည်းလမ်းများနှင့် အရှင်မြတ်နှစ်သက်သည့်နည်းလမ်းများအား ပြသပေးနိုင်သည့် လမ်းညွှန်မှုတစ်ခုအနေဖြင့် အကျိုးပြုနိုင်ပါစေရန် တောင်းဆုဒုအာအ်ပြုအပ်ပါသည်။ အာမီန်း။