𝐇𝐚𝐛𝐢𝐭 𝐍𝐨. 20 𝐅𝐢𝐧𝐝𝐢𝐧𝐠 𝐬𝐦𝐚𝐥𝐥 𝐜𝐡𝐮𝐧𝐤𝐬 𝐨𝐟 𝐭𝐢𝐦𝐞 𝐭𝐨 𝐫𝐞𝐚𝐝

စာဖတ်ဖို့အချိန်အတိုလေးတွေ ဖန်တီးထားတဲ့ အလေ့အကျင့်။

---

“စာအုပ်စာပေ လူ့မိတ်ဆွေ” တို့၊ တိုးတက်ကြီးပွားချင်ရင် စာများများဖတ်ပါ တို့ အစရှိတဲ့ စကားတွေကို ငယ်စဉ်ကတည်းက ကျွန်မတို့ကြားနေကြပါ။

တကယ်တမ်း သီးသန့်အချိန်ထုတ်ပြီး စာဖတ်ဖို့ လုပ်တတ်ကြပေမဲ့ မဖတ်ဖြစ်သွားတာက ပိုများနေတတ်ပါတယ်။

စာအုပ်တွေဖတ်၊ ပညာတွေလေ့လာဖို့ကလည်း မလုပ်ဘဲ ထားထားလို့မရ။

ဒီတော့ ကျွန်မတို့ အချိန်အများကြီး မသုံးဘဲ စာကို ရအောင်ဘယ်လိုဖတ်ကြမလဲ။

တနေ့တာလုံးက မထိုင်ရလောက်အောင် အလုပ်တွေရှုပ်နေတယ်ဆိုပေမဲ့ တကယ်တမ်းမှာ ခဏတာလေး စာဖတ်ဖို့ အချိန်ထုတ်လို့ရတာရှိပါတယ်။

ဥပမာအားဖြင့် အလုပ်သွားနေရသူတွေအတွက်ဆို ကားစောင့်နေရချိန်၊ ကားစီးနေရချိန်တွေက မသိလိုက်မသိမသာ ကုန်သွားကြတယ်မဟုတ်လား။

အဲ့လိုအစား အဲ့ဒီအချိန်တိုလေးကို ၅ မိနစ်ရရ ၁၀ မိနစ်ရရ နေ့စဉ်စာဖတ်ဖြစ်သွားအောင် ကြိုးစားသွားမယ်ဆိုရင် အချိန်တွေအပို မဖန်တီးရဘဲ စာလည်းဖတ်ဖြစ်သွားမှာပါ။

ဒီလိုအချိန်တိုလေးတွေကို တတ်နိုင်သမျှ တနေ့တာမှာ ဖန်တီးပြီး စာဖတ်တဲ့အလေ့အကျင့်လေးလုပ်ကြည့်ပါ။

ဥပမာအနေနဲ့ ထပ်စဉ်းစားကြည့်မယ်ဆိုရင် အပေါ်မှာ ပြောခဲ့သလို ကားစီးတဲ့အချိန်က အသွားလည်းရှိမယ်၊ အပြန်မှာလည်း ဖတ်လို့ရမယ်။ နောက် ထမင်းစားပြီးပြီးချင်း လမ်းလျောက်ရင်းဖတ်တာဖြစ်ဖြစ်၊ ထိုင်ပြီးဖတ်တာဖြစ်ဖြစ် ရသလို ညအိပ်ယာမဝင်ခင်ဖြစ်ဖြစ် ၁၀မိနစ်လောက် စာဖတ်ဖို့ အချိန်ထုတ်ကြည့်သင့်ပါတယ်။

အရေးကြီးတာက စဉ်ဆက်မပြတ် ကိုယ်သတ်မှတ်ထားတဲ့အချိန်တိုလေးတွေ ရောက်တိုင်း စာကို ဖတ်ဖြစ်အောင် ဖတ်တဲ့အလေ့အကျင့် လုပ်ကြည့်ဖို့ပါပဲ။

တစ်ပတ်ကနေ တစ်လ၊ တစ်လ ကနေ ၃လ ကြာကြာ တောက်လျောက် မပျက်မကွက်လုပ်သွားတဲ့အခါ ကိုယ်သိပ်အားမစိုက်လိုက်ရဘဲ လုပ်နေကျ အကျင့်တစ်ခု အဖြစ် ပြောင်းသွားမှာမို့ တစ်ရက်တစ်ညနဲ့ မရပ်လိုက်ဘဲ အလေ့အကျင့်တွေကို နေ့တဓူဝလုပ်နေကျအလုပ်တွေအထိ ပြောင်းလဲ ကြည့်ကြဖို့ တိုက်တွန်းလိုက်ပါရစေနော်။