𝐇𝐚𝐛𝐢𝐭 𝐍𝐨.𝟐𝟕 𝐇𝐚𝐛𝐢𝐭 𝐨𝐟 𝐏𝐫𝐚𝐲𝐢𝐧𝐠 𝐒𝐚𝐥𝐚𝐡 𝐨𝐧 𝐓𝐢𝐦𝐞

အချိန်မှန် နမာဇ်ဖတ် ဝတ်ပြုတတ်သည့်အလေ့အကျင့်။

---

ကျွန်မတို့ ငယ်ငယ်လေးကတည်းက နမာဇ်ဝတ်ပြုဖို့ကို ဦးစားပေးဖို့ လူကြီးတွေက သင်ကြားပေးထားပါတယ်။

နမာဇ်ဖတ်တယ်ဆိုတာ မွတ်စ်လင်မ်တိုင်း လုပ်ကိုလုပ်ရမဲ့ မဏ္ဍိုင်ကြီး ၅ ရပ်ထဲက တစ်ရပ်ဖြစ်တယ်ဆိုတာလည်း ကျွန်မတို့ သိပြီးသားပါ။

နမာဇ်ဖတ်တဲ့အချိန်က ဖန်ဆင်းရှင်နှင့် ကျွန်မတို့တွေ့ဆုံကြတဲ့ အချိန်ကောင်းတစ်ခုလည်းဖြစ်ပါတယ်။

ခုလို လမြတ်ရမဇာန်မှာ ကျွန်မတို့ တတ်နိုင်သမျှ ‌အေဗာသာဒ်တွေလုပ်ကြသလို နမာဇ်ကိုလည်း မပြတ်မကွက် ဖတ်တတ်ကြတယ်ဆိုပေမဲ့ ကျန်လတွေမှာတော့ အချိန်မှန်ဖတ်သင့်တာကို သိသိကြီးကြီးနဲ့ နောက်ရွှေ့တတ်ကြပါတယ်။

နမာဇ်အချိန်မှန်မှန်ဖတ်ခြင်းက အကျိုးဆဝါးဗ်တွေအများကြီးရတာကို သိသိကြီးနှင့် ကိုယ်အလုပ်များနေတဲ့အလျောက် မသိမသာနဲ့ အချိန်ဆွဲတတ်ကြပါတယ်။

နမာဇ်အချိန်မှန်ဖတ်ဖို့အရေးကြီးတာကို မြင်သာအောင် ဥပမာပေးရမယ်ဆိုရင် ဆရာဝန်ညွှန်ကြားထားတဲ့ ဆေးတစ်ခုကို အချိန်မှန်သောက်ဖို့ ကျွန်မတို့ ကြိုးစားအားထုတ်လေ့ရှိပါတယ်။

အစားမစာခင်၊ အစားစားပြီး၊ ဆေးတစ်ခုနဲ့ တစ်ခု ဘယ်နှစ်နာရီခြား အစရှိသဖြင့် မမေ့မလျော့ အချိန်မှန်လိုက်သောက်ကြပါတယ်။

ဒါမှသာ ဆေးက အာနိသင်ကောင်းကောင်းပျောက်ပြီး ရောဂါမြန်မြန်ပျောက်မှာ ကျွန်မတို့ သိနေတာကိုး။

ဒီလို ကိုယ့်ကျန်းမာရေးအတွက် အရေးကြီးတယ်လို့ သိနေတာကို အချိန်မှန်လုပ်နိုင်ဖို့ ကြိုးစားနေနိုင်တယ်ဆိုရင် ကျွန်မတို့ ကိုယ်စိတ်နှလုံး ကျန်းမာသုခရဖို့၊ နှစ်ဘဝလုံးမှာအောင်မြင်မှုရဖို့၊ ဖန်ဆင်းရှင်နှင့် နီးစပ်မှုရှိနိုင်ဖို့ လို အရေးကြီးတဲ့ နမာဇ်ဖတ်ဝတ်ပြုခြင်းကို အချိန်မှန်မှန်ပြုလုပ်သွားဖို့ မမေ့လျော့သင့်ပါဘူး။

ကျွန်မရဲ့ မိတ်ဆွေတို့လည်း ကိုယ့်ရဲ့ တစ်နေ့တာအချိန်ကို သေချာ စီမံပြီး အရေးကြီးတဲ့ နမာဇ်ဖတ်ဝတ်ပြုခြင်းကို လမြတ်ရမဇာန်ပြီးသွားရင်လည်း ဦးစားပေးပြီး အချိန်မှန်ဖတ်တဲ့ အလေ့အကျင့်ကောင်းလေး ပြုလုပ်ရင်း ကုသိုလ်အကျိုးဆဝါးဗ် အမြောက်အများပိုင်ဆိုင်နိုင်ကြပါစေနော်။